Hoxe vin unha escena na rúa que lembroume tempos
vellos: uns feirantes estaban a tocar cun órgano e unha trompeta unhas cancións
desas que a ritmo de pasodoble lémbranme a miña nenez, cando os xitanos, cunha
cabra a que facían bailar ou facer
malabarismos enriba dunha cadeira, aledaban as tardes dos días festivos cercanos
ao Nadal. Por sorte, agora xa non levan a pobre cabra, pero seguen espallando a
música polas rúas e pedindo que desde as casas lles boten unhas moedas. Eu son
pouco experta nesas lides, e a miña esmola relucente deu un chimpo e desde a
acera rematou caendo no medio da rúa, pero un dos homes que levaba o prato veu deseguida
e recolleuna asiña.
Tempos antigos de novo, pensei, tempos de fame e como
diría Manolo Rivas na súa poesía “O pan negro” do negro pan dos cuarenta, cando o medo acubillábase entre as
sombras. Ese medo volve agora, medo a non saíres da crise, de perder o traballo e de que o noso mundo se volva tolo de verdade.Curiosamente eses feirantes que rúaban coa súa música encántaballe a miña nai cando era nena, ela sempre dime que aledábanlle as tardes da súa nenez, coa súa música festeira, co seu son peculiar. Hoxe estaban a tocar “Anxiños negros” de Machín e “Na beira do mar”, unha mistura curiosa, pero que a min tamén lembroume aquelas tardes da miña nenez, cando a xente ría moito mais e aínda quedaba a esperanza de tempos mellores.
Déixovos unha
foto, como testemuña.
No hay comentarios:
Publicar un comentario